Սիրո նոկտյուրն

«Ինչ էլ գրեմ` ստացվում է հայեցի»: Այդպիսին է մեր արվեստի մեծաշնորհ ներկայացուցիչներից մեկի` Առնո Բաբաջանյանի խորհրդանշական խոստովանությունը:

Շուրջ կես դար շարունակվեց ստեղծագործող ու կատարող, երաժշտության մոլեռանդ սիրահար արվեստագետի գործունեությունը, որն աոաջին իսկ քայլերից գրավեց ողջ Խորհրդային Միության երաժշտասեր հասարակության ուշադրությունը:

Ինչ ժանրի էլ դիմեր կոմպոզիտորը` գտնում էր դեպի ունկնդրի հոգին տանող ուղիներ: 

Առնո Բաբաջանյանի ստեղծագործական հարուստ ժառանգությունը ներառում է երգեր, գործիքային կատարումներ, սիմֆոնիկ երաժշտություն: Նա ստեղծագործել է տարբեր ոճերով` դասական, պոպ, ջազ:

Բաբաջանյանի ստեղծագործական ոճը ձևավորվել է Արամ Խաչատրյանի և Սերգեյ Ռախմանինովի ազդեցությամբ:

Լավագույն ֆիլմերից շատերում հնչում են նրա հեղինակած կատարումները` «Առաջին սիրո երգը»,«Երջանկության մեխանիկան», «Հարսնացուն հյուսիսից»: 

Երևանի պետական բժշկական համալսարանի նիստերի դահլիճում, ԵՊԲՀ ուսանողական խորհրդարանի 20-ամյակի շրջանակներում տեղի ունեցավ համերգ` նվիրված Առնո Բաբաջանյանի 90-ամյակին, որը կրում էր «Սիրո նոկտյուրն» խորագիրը: Համերգին մասնակցեց համալսարանական «Մեդունի» էստրադային համույթը: 

Համերգին ներկա էին Երևանի պետական բժշկական համալսարանի ռեկտոր, պրոֆեսոր Դերենիկ Դումանյանը, Հայաստանի երիտասարդական հիմնադրամի հոգաբարձուների խորհրդի համակարգող, ՀՀ ԱԺ պատգամավոր Կարեն Ավագյանը, համերգի հատուկ հյուրերն էին ՀՀ վաստակավոր արտիստուհի Գայանե Հովհաննիսյանը և երգիչ Մհերը: Համերգի գեղարվեստական ղեկավարը ԵՊԲՀ սեքսոպաթոլոգիայի կլինիկայի բժիշկ-սեքսոպաթոլոգ Վրեժ Շահրամանյանն էր: Համերգի ընթացքում հնչեցին Առնո Բաբաջանյանի երգացանկից ըտրված ամենասիրված և լավագույն երգերը, որոնք փայլուն կերպով կատարեցին ՀՀ վաստակավոր արտիստ Գայանե Հովհաննիսյանը, երգիչ Մհերը և մեր ուսանողները:

Հարցեր, պատասխաններ, մեկնաբանություններ